מילים: ר' שלמה אבן גבירול
 

אֱלֹהִים, אֵלִי אַתָּה, אֲשַׁחֲרֶךָּ בְּסוֹד סְגֻלָּתֶךָ

אֱמוּנָתְךָ אוֹדִיעַ וְאַגִּיד גְּדֻלָּתֶךָ.

בְּקָרְאִי עֲנֵנִי, יוֹם אָקוּם בְּקֶרֶב קְהִלָּתֶךָ

אֲדֹנָי שְׂפָתַי תִּפְתָּח וּפִי יַגִּיד תְּהִלָּתֶךָ.

אֱלֹהִים, אֵלִי אַתָּה, נֶגְדְּךָ עֲלוּמַי נֶחֱשָׂפוּ,

נַפְשִׁי וְעַצְמוֹתַי מִפַּחְדְּךָ שֻׁסָּפוּ.

בְּקָרְאִי עֲנֵנִי, יוֹם נְבֻכִים לְיֶשְׁעֲךָ נִכְסָפוּ,

נְדִיבֵי עַמִּים נֶאֱסָפוּ.

אֱלֹהִים, אֵלִי אַתָּה, יֹעֵט צְדָקָה לִלְבֹּשׁ,

יְרֵאֶיךָ הִרְשׁוּנִי וְאָרוּץ וְאֵין בֹּשׁ.

בְּקָרְאִי עֲנֵנִי, יוֹם יוֹקְשִׁי תִּכְבֹּשׁ וְעָצְבִּי תַּחֲבֹשׁ,

יְהִי לִבִּי תָמִים בְּחֻקֶּיךָ לְמַעַן לֹא אֵבוֹשׁ.

אֱלֹהִים, אֵלִי אַתָּה, שְׁמֹר שַׂרְעַפַּי לְבַל יַזְנִיחוּנִי,

שְׁגִיאוֹת שְׂפָתַי בַּל יַדִּיחוּנִי.

בְּקָרְאִי עֲנֵנִי, יוֹם שְׁבָחֶיךָ עֲצָבַי יְשַׁכְּחוּנִי,

שְׁלַח אוֹרְךָ וַאֲמִתְּךָ הֵמָּה יַנְחוּנִי.

אֱלֹהִים, אֵלִי אַתָּה, לְךָ אֲצַפֶּה צוּר מִשְׂגַּבִּי,

לְאַמְּצֵנִי וּלְחַזְּקֵנִי כִּי אֵין כֹּחַ בִּי.

בְּקָרְאִי עֲנֵנִי, יוֹם לְבָרֵר וְלִצְרֹף חוֹבִי,

לֵב טָהוֹר בְּרָא לִּי אֱלֹהִים וְרוּחַ נָכוֹן חַדֵּשׁ בְּקִרְבִּי.

אֱלֹהִים, אֵלִי אַתָּה, מָרוֹם הַשּׁוֹכְנִי גְבוֹהִים,

מִמַּעֲמַקִּים אֶקְרָא נֶגְדְּךָ וְאָהִים.

בְּקָרְאִי עֲנֵנִי, יוֹם מִלַּלְתִּי בְּסוֹד כְּמֵהִים,

מִי יוֹדֵעַ יָשׁוּב וְנִחַם הָאֱלֹהִים.

אֱלֹהִים, אֵלִי אַתָּה, הִנְנִי לְפָנֶיךָ בַּאֲשָׁמִי,

הָעֲוֹנוֹת אִם תִּשְׁמָר יָהּ אֲדֹנָי מִי יַעֲמֹד מִי.

בְּקָרְאִי עֲנֵנִי, יוֹם הַזֶּה אַל תָּבוֹא בְּמִשְׁפָּט עִמִּי,

הֵן בְּעָוֹן חוֹלָלְתִּי וּבְחֵטְא יֶחֱמַתְנִי אִמִּי.

אֱלֹהִים, אֵלִי אַתָּה, הִקְדַּמְתָּ מָזוֹר לְיַשְּׁרֵנִי,

הֲכִינוֹתָ יוֹם כֹּפֶר רָצוֹן בּוֹ לְעַטְּרֵנִי.

בְּקָרְאִי עֲנֵנִי, יוֹם הִנָּתֵק עֲבוֹת עָוֹן יַאַסְרֵנִי,

הֶרֶב כַּבְּסֵנִי מֵעֲוֹנִי וּמֵחַטָּאתִי טַהֲרֵנִי.

אֱלֹהִים, אֵלִי אַתָּה, קִרְבָתְךָ יַחְפְּצוּן רַעְיוֹנָי,

קְדֹרַנִּית שַׁחוֹתִי מִפְּנֵי זְדוֹנָי.

בְּקָרְאִי עֲנֵנִי, יוֹם קָרָאתָ לְגֶזַע אֱמוּנָי,

קְחוּ עִמָּכֶם דְּבָרִים וְשׁוּבוּ אֶל אֲדֹנָי.

אֱלֹהִים, אֵלִי אַתָּה, טִהֲרוּ לְבָבָם לְחוּקֶיךָ,

טַעַם וּמַשְׁקֶה חָשְׂכוּ חֲשׁוּקֶיךָ.

בְּקָרְאִי עֲנֵנִי, יוֹם טָכוּס לְעַנּוֹת נֶפֶשׁ דְּבֵקֶיךָ,

טוֹב לִי כִי עֻנֵּיתִי לְמַעַן אֶלְמַד חֻקֶּיךָ.

אֱלֹהִים, אֵלִי אַתָּה, נָשָׂאנוּ נֶגְדְּךָ עַפְעַפָּיִם,

נִכְחֲךָ נִצַּבְנוּ בְשַׁחוּת אַפָּיִם.

בְּקָרְאִי עֲנֵנִי, יוֹם נְבָרֵר שַׁקְרוּת שַׂרְעַפָּיִם,

נִשָּׂא לְבָבֵנוּ אֶל כַּפָּיִם אֶל אֵל בַּשָּׁמַיִם.

אֱלֹהִים, אֵלִי אַתָּה, בָּאתִי הַיּוֹם לַהְגּוֹת צִדְקֶךָ,

בֵּאַרְתִּי חֻקֶּיךָ בְּקֶרֶב חֶלְקֶךָ.

בְּקָרְאִי עֲנֵנִי, יוֹם בִּשַּׂרְתִּי צֶדֶק בִּקְהַל דְּבֵקֶיךָ,

בָּרוּךְ אַתָּה יְיָ לַמְּדֵנִי חֻקֶּיךָ.

אֱלֹהִים, אֵלִי אַתָּה, רָם לְכָל שֹׁאֵל נִדְרָשׁ,

רְצֵנִי בְּהִתְעַטְּפִי כֶעָנִי וָרָשׁ.

בְּקָרְאִי עֲנֵנִי, יוֹם רֶגֶשׁ דְּמָעַי נִגְרָשׁ,

רָאִיתָה יְיָ אַל תֶּחֱרָשׁ.

אֱלֹהִים, אֵלִי אַתָּה, בְּצִדְקָתְךָ עֲוֹנַי יִדָּחוּ,

בְּמֵימֵי דְמָעַי פְּשָׁעַי יִמָּחוּ.

בְּקָרְאִי עֲנֵנִי, יוֹם בְּשֹׂרוֹת יִשְׁעִי יִצְמָחוּ,

בַּייָ תִּתְהַלֵּל נַפְשִׁי יִשְׁמְעוּ עֲנָוִים וְיִשְׂמָחוּ.

אֱלֹהִים, אֵלִי אַתָּה, יָגֹרְתִּי מְאֹד מֵחֲמַת מִגְעַרְתֶּךָ,

יָדַעְתִּי כִּי חֶסֶד וֶאֱמֶת אִמְרָתֶךָ.

בְּקָרְאִי עֲנֵנִי, יוֹם יָזַמְתִּי לִשְׁמֹר מִשְׁמַרְתֶּךָ,

יִמָּלֵא פִי תְּהִלָּתֶךָ כָּל הַיּוֹם תִּפְאַרְתֶּךָ.

אֱלֹהִים, אֵלִי אַתָּה, יְחִידִי יְצוּרָיו יְעִידוּהוּ,

יְבָרְכוּהוּ קְרָבַי וַעֲצָמַי יְהוֹדוּהוּ.

בְּקָרְאִי עֲנֵנִי, יוֹם יָדַעְתִּי יְחִידִים יְיַחֲדוּהוּ,

יִרְאֵי יְיָ הַלְלוּהוּ כָּל זֶרַע יַעֲקֹב כַּבְּדוּהוּ.

אֱלֹהִים, אֵלִי אַתָּה, הֲגוֹת צִדְקְךָ שְׂפָתַי פָּתַחְתִּי,

הִנֵּה עִמִּי דְּבָרִים לָקַחְתִּי.

בְּקָרְאִי עֲנֵנִי, יוֹם הִלַּלְתִּיךָ וְכַפַּי שִׁטַּחְתִּי,

הַשְׁמִיעֵנִי בַבֹּקֶר חַסְדֶּךָ כִּי בְךָ בָטָחְתִּי.

אֱלֹהִים, אֵלִי אַתָּה, וְעָדֶיךָ יִצְדְּקוּ עֵדֶיךָ,

וְיַגִּידוּ כִּי אֶפֶס צוּר בִּלְעָדֶיךָ.

בְּקָרְאִי עֲנֵנִי, יוֹם וִעַדְתּוֹ לְטַהֵר יְדִידֶיךָ,

וַאֲקַוֶּה שִׁמְךָ כִּי טוֹב נֶגֶד חֲסִידֶיךָ.

אֱלֹהִים, אֵלִי אַתָּה, דָּרַשְׁתִּי קִרְבָתְךָ הַקְרִיבֵנִי,

דְּלָתֶיךָ בְדָפְקִי חַסְדְּךָ יְסֹבְבֵנִי.

בְּקָרְאִי עֲנֵנִי, יוֹם דַּלֹתִי יֶשְׁעֲךָ יְשַׂגְּבֵנִי,

דַּלּוּ עֵינַי לַמָּרוֹם יְיָ עָשְׁקָה לִּי עָרְבֵנִי.

אֱלֹהִים, אֵלִי אַתָּה, הַנּוֹצֵר נֶפֶשׁ וּפֹעֲלָהּ,

הַיּוֹדֵעַ וָעֵד מַעֲלָלָהּ וּמַעְגָּלָהּ.

בְּקָרְאִי עֲנֵנִי, יוֹם הִתְוַדּוֹת נַפְשִׁי מַעֲלָהּ,

הֵן יְיָ יָדַעְתָּ כֻלָּהּ.

אֱלֹהִים, אֵלִי אַתָּה, אֵלִי וְצוּר יְשׁוּעָתִי,

אֵלֶיךָ קָרָאתִי מִבּוֹר כִּנְעָתִי.

בְּקָרְאִי עֲנֵנִי, יוֹם אֶשְׁפֹּךְ לְפָנֶיךָ לְבָבִי וְדִמְעָתִי,

אַל תַּעְלֵם אָזְנְךָ לְרַוְחָתִי לְשַׁוְעָתִי.

אֱלֹהִים, אֵלִי אַתָּה, בֹּחֵן לְבָבִי וְרַעְיוֹנָי,

בָּנְתָּה לְרֵעִי מִמְּרוֹם עֶלְיוֹנָי.

בְּקָרְאִי עֲנֵנִי, יוֹם בָּרוֹתִי חֲבוּיַת מַצְפֻּנָי,

בְּיָדְךָ אַפְקִיד רוּחִי פָּדִיתָה אוֹתִי אֲדֹנָי.

אֱלֹהִים, אֵלִי אַתָּה, נִסְמַכְתִּי עָלֶיךָ עוֹדְדֵנִי,

נִסְתַּרְתִּי בְצִלְּךָ הָגֵן בַּעֲדֵנִי.

בְּקָרְאִי עֲנֵנִי, יוֹם נִבְהָל זְכַרְתִּיךָ זָכְרֵנִי וּפָקְדֵנִי,

נִדְבוֹת פִּי רְצֵה נָא יְיָ וּמִשְׁפָּטֶיךָ לַמְּדֵנִי.

אֱלֹהִים, אֵלִי אַתָּה, גְּדוּדֶיךָ בַּעֲצֶרֶת יֵשֵׁבוּ,

גּוֹעִים כַּצֹּאן הַיּוֹם יִקָּשֵׁבוּ.

בְּקָרְאִי עֲנֵנִי, יוֹם גְּאוּלֶיךָ נְקִיִּים יֵחָשֵׁבוּ,

גָּלְמִי רָאוּ עֵינֶיךָ וְעַל סִפְרְךָ כֻּלָּם יִכָּתֵבוּ.

אֱלֹהִים, אֵלִי אַתָּה, בְּשָׁפְכִי שִׂיחִי עָלֶיךָ יֶעֱרָב,

בְּעָרְכִי רִנָּתִי לְפָנֶיךָ תִקְרָב.

בְּקָרְאִי עֲנֵנִי, יוֹם בִּעַרְתִּי שְׁרִירוּת לֵב סֵרַב,

בִּשַּׂרְתִּי צֶדֶק בְּקָהָל רָב.

אֱלֹהִים, אֵלִי אַתָּה, יוֹדֵעַ מִסְתְּרֵי מְלִיצוּת,

יְגוֹנִי הָסֵר וְהָמֵר בַּעֲלִיצוּת.

בְּקָרְאִי עֲנֵנִי, יוֹם יָגֹרְתִּי פְקֻדַּת הֲלָצוּת,

יִרְאָה וָרַעַד יָבֹא בִי וַתְּכַסֵּנִי פַּלָּצוּת.

אֱלֹהִים, אֵלִי אַתָּה, רְפָא מְשׁוּבַת לֵב עָקֹב,

רְאֵה עֶצֶם עָשֵׁש וְגַם נִרְקַב רָקֹב.

בְּקָרְאִי עֲנֵנִי, יוֹם רַחַשׁ מְלִיצַי תִּקֹּב,

רָצִיתָ יְיָ אַרְצֶךָ שַׁבְתָּ שְׁבוּת יַעֲקֹב.

אֱלֹהִים, אֵלִי אַתָּה, וְעָלֶיךָ גַּלּוֹתִי אֳרָחָי,

וְאֶעֱרֹךְ מַלְקוֹחַי תְּמוּרַת מֶרְקָחָי.

בְּקָרְאִי עֲנֵנִי, יוֹם וְאָבִיא שְׁבָחַי תַּחַת זְבָחָי,

וְאַל תָּבוֹא בְמִשְׁפָּט אֶת עַבְדֶּךָ כִּי לֹא יִצְדַּק לְפָנֶיךָ כָל חָי.

אֱלֹהִים, אֵלִי אַתָּה, לְבַשׁ הַיּוֹם צֶדֶק מַעֲטֶךָ,

לִרְעוֹת שְׁאֵרִית שְׁבָטֶיךָ בְּשִׁבְטֶךָ.

בְּקָרְאִי עֲנֵנִי, יוֹם לְהַפְגִּיעָם צִדְקְךָ וְקָשְׁטֶךָ,

לְמַעַן תִּצְדַּק בְּדָבְרֶךָ תִּזְכֶּה בְשָׁפְטֶךָ.

אֱלֹהִים, אֵלִי אַתָּה, חַנּוּן הַנַּעֲרָץ בְּסוֹד שַׂרְפֵי מְעוֹנָי,

זָכְרֵנִי וּפָקְדֵנִי לְטוֹבָה בְּהִתְחַנְּנִי בְהֶגְיוֹנָי.

בְּקָרְאִי עֲנֵנִי, יוֹם קְרֹא אֶקְרָא בְּמִקְהֲלוֹת אֱמוּנָי,

נִשְׁמַת כָּל חַי תְּבָרֵךְ אֶת שִׁמְךָ אֲדֹנָי.